ឡុង វីរៈយុទ្ធ កាក់កបជាមួយ ការថតភាពយន្ត
Tuesday, 13 December 2011 15:26
ភ្នំពេញ: លោក ឡុង វីរៈយុទ្ធ តារាសម្តែងដែល ទស្សនិកជនស្គាល់ច្បាស់ តាមរយៈការសម្តែង ជាតួឯកប្រុសឈ្មោះ “នាយភូ” ក្នុងរឿង “ភូមិខ្ញុំស្រស់ឆើតឆាយ” ជាមួយនឹងតួស្រីក្រម៉ិច ក្រមើមកញ្ញា សុខ សោម៉ាវត្តី នោះ ហាក់ដូចកាក់កបជាមួយការសម្តែងខ្សែភាពយន្តជាជាង សិល្បៈផ្សេងទៀត ព្រោះមានការថតភាពយន្ត មិនដាច់ បន្ទាប់ពីចប់រឿងមួយចូលរឿងមួយទៀត។
បច្ចុប្បន្ន លោក ឡុង វីរៈយុទ្ធ បាននឹងកំពុងតែថតខ្សែភាពយន្តរឿង ”ពេជ្រក្នុងបេះដូង” ឲ្យស្ថានីយទូរទស្សន៍ប៉ុស្តិ៍លេខ៥ ជាមួយនឹងតួឯកស្រី កញ្ញា ភិន សុដាលីស។
តារាវ័យក្មេង ដែលទាមទារបានប្រជាប្រិយពីទស្សនិកជនតាមរយៈ ការសម្តែងបែបក្រម៉ិច ក្រមើមលោក ឡុង វីរៈយុទ្ធ បានប្រាប់មជ្ឈមណ្ឌលព័ត៌មានដើមអម្ពិល តាមទូរស័ព្ទនៅថ្ងៃទី១៣ ខែធ្នូ ឆ្នាំ២០១១នេះថា ខ្លួនមានការមមាញឹកច្រើន ទាំងការថតស្ពតពាណិជ្ជកម្ម ថតរឿងព្រោះថា ខ្សែភាពយន្ត ដែលលោកថតឲ្យស្ថានីយ ទូរទស្សន៍ប៉ុស្តិ៍លេខ៥ គឺនៅមិនទាន់ចប់នៅឡើយទេ។
តារាសម្តែង ដែលមានភាពលេចធ្លោនៅក្នុងខ្សែភាពយន្តរឿង ”ភូមិខ្ញុំស្រស់ឆើតឆាយ” រូបនេះបន្តទៀតថា ”នៅក្នុងខ្សែភាពយន្តនេះ គឺខ្ញុំសម្តែងជាតួឯកប្រុស ហើយតួឯកស្រីគឺ កញ្ញា ភិន សុដាលីស នេះជាលើកទីមួយហើយដែលខ្ញុំ បានចាប់ដៃគូសម្តែងជាមួយគាត់ ហើយបច្ចុប្បន្ន ខ្សែភាពយន្តនេះ កំពុងតែដាក់បញ្ចាំង នៅក្នុងស្ថានីយទូរទស្សន៍ប៉ុស្តិ៍លេខ៥ ដែលគ្រោងនឹងថតចប់ ប្រហែលជាចុងខែធ្នូនេះ ព្រោះថាពេលនេះរឿងនេះ ចាក់បញ្ចាំងបណ្តើរថតបណ្តើរ”។
បុរសរូបស្រស់សង្ហាវ័យក្មេង ឡុង វីរៈយុទ្ធ នាពេលកន្លងមក ក៏ធ្លាប់មានលេចឮព័ត៌មានថា បានរៀបការស្ងាត់ៗជាមួយពិធីការិនីរូបស្រស់សោភា កញ្ញា សុខ សោម៉ាវត្តី ផងដែរ តែជុំវិញបញ្ហានេះ ត្រូវបានអ្នករៀបចំកម្មវិធី ដែលមានឈ្មោះបោះសំឡេងប្រចាំនៅស្ថានីយទូរទស្សន៍បាយ័ន លោក គង់ វិសាល ចេញមុខបកស្រាយថា ជារឿងមិនពិត ហើយរូបថតរៀបការនោះ គ្រាន់តែជាការ ថតស្ពតពាណិជ្ជកម្ម ឲ្យសំអាងការតែប៉ុណ្ណោះ៕
ប្រភព DAP NEWS
0 comments:
Post a Comment