Friday, 27 January 2012 13:42 ដោយ ៖យ៉ាន់ សុខរិទ្ធ Posted ID-067
ភ្នំពេញ៖ ថ្មីៗនេះសម្រាប់ តារាចម្រៀង សំនៀងស្រទន់ មាស សុខសោភា បានលេចឮខ្ទរខ្ទា ពេញពិភពសិល្បៈ ក៏ដូចជាពិភពមហាជនថា តារាស្រីកំពុងឡើងកូដ ប្រចាំផលិតកម្មថោន រូបនេះ កំពុងត្រៀមរៀបចំវេច បង្វេច ចាកចេញពីផលិតកម្ម របស់ខ្លួនចូលទៅកាន់ផលិតកម្មរស្មីហង្សមាស។ ការលេចឮព័ត៌មានដ៏រសើប នេះគឺ ស្របពេលដែល មួយរយៈចុងក្រោយនេះមានតារា ចម្រៀងថ្មីៗជាច្រើនរូប បានក្តោបឱកាសហាក់ចូល ក្នុងផលិតកម្មរស្មីហង្សមាសជាបន្តបន្ទាប់។
ព័ត៌មាននៃការដើរចេញពីផលិតកម្មថោនរបស់តារាចម្រៀងមាស សុខសោភា គឺខណៈ ដែលតារាចម្រៀងទើប បែកបាក់ស្នេហ៍ សុគន្ធ នីសា បានសម្រេចចិត្តយ៉ាងតក់ក្រហល់ដើរចេញពីផលិតកម្មហង្សមាសដែលជាទ្រនំ ធ្លាប់សុខសាន្តរូមសុខរួមទុក្ខជាមួយអតីតគូស្នេហ៏ សុខ ជំនោរ ចូលទៅកាន់ផលិតកម្មថោន ហើយកំពុងតែ ត្រៀមចេញវ៉ុលថ្មីរបស់ខ្លួននៅលើទីផ្សារទៀតផង។ តើបន្ទាប់ពីសុគន្ធ នីសា ចូលទៅជ្រកក្នុងទ្រនំ ថោនប៉ះជើង ខ្លាំងមាស សុខសោភា មានរឿងអ្វីកើតឡើងខ្លះ? តើព័ត៌មាននៃការចាកចេញរបស់មាស សុខសោភា នៅពេល នេះអាចបណ្តាលមកពីវត្តមានរបស់សុគន្ធ នីសា ជាន់ជើងក្នុងទឹកដីថោនឬយ៉ាងណា? ព្រោះបើពិនិត្យ មើលថ្មីៗ នេះ បទចម្រៀងវ៉ុលថ្មីរបស់មាស សុខសោភា ហាក់ស្ងប់ស្ងាត់ផ្ទុយស្រឡះពីសុគន្ធ នីសា ដែលនាងគ្រាន់តែចូល ភ្លាមត្រូវផលិតកម្មយកចិត្តទុកដាក់និពន្ធបទថ្មីៗឲ្យច្រៀងភ្លែត....! ។ ពាក្យចាស់តែងពោលថា " ភ្នំមួយមិនអាច មានខ្លាពីរបានទេ " ប៉ុន្តែបើខ្លានោះញីមួយ ឈ្មោលមួយប្រហែលជាអាចរស់ នៅដោយសុខសាន្តនឹងគ្នាបាន។
ងាកមកមើលទ្រនំនៃផលិតកម្មថោនវិញ តើអាចនិយាយបានថាក្រោយពេលសុគន្ធ នីសា ជាតារាល្បីនិងជាជើង ខ្លាំងក្នុងពិភពសិល្បៈផងនោះ ប៉ះជាមួយនិងជើងខ្លាំងមាស សុខសោភា អាចជាចំណែកមួយនៃព័ត៌មានចាក ចេញរបស់មាស សុខសោភា សមនឹងពាក្យស្លោកខាងលើឬយ៉ាងណា ?
ជុំវិញទិដ្ឋភាពព័ត៌មាននៃការដើរចេញរបស់មាស សុខសោភានៅពេលនេះត្រូវបាននាងបញ្ជាក់ប្រាប់ មជ្ឈ មណ្ឌលព័ត៌មានដើមអម្ពិលកាលពីថ្ងៃទី២៦ ខែមករា ឆ្នាំ២០១២ ឲ្យដឹងថា " រឿងនេះខ្ញុំទទួលបាន ការសាកសួរ ពីអ្នកគាំទ្រតាមបណ្តាញ ហ្វេសប៊ុក និងមិត្តភក្រ័ស្គាល់គ្នាជាច្រើនទៀតថា ខ្ញុំចេញពីផលិតកម្មថោនហើយ មែនទេ? ខ្ញុំបានប្រាប់ទៅពួកគាត់វិញថា អត់មានរឿងបែបនឹងកើតឡើងទេ "។ មាស សុខសោភា និយាយទៀត ថា " កន្លងមកមានគេទាក់ទងឲ្យខ្ញុំទៅចូលក្នុងផលិតកម្មហង្សមាសមែន ដោយអ្នកទាក់ទងមកខ្ញុំនោះគឺលោក អ៊ិន ទីតូ ប៉ុន្តែខ្ញុំបានបដិសេធព្រោះខ្ញុំមិនអាចទៅចោលទ្រនំនៃ ផលិតកម្មថោនបានឡើយ " ។
ជាការពិតតារាចម្រៀងមាស សុខសោភា ថ្វីត្បិតតែនាងច្រៀងប្រចាំក្នុងផលិតកម្មថោនក្តីប៉ុនែ្តនាងមិនបានចុះ កុងត្រាដូចតារាដ៏ទៃឡើយ ហើយអាចច្រៀងនៅផលិតកម្មផ្សេងទៀតបាន ពោលគឺនាងមានសិទិ្ធសេរីភាពច្រើន ទាំងការច្រៀងឲ្យក្រុមហ៊ុនប្រគំតន្រ្តីតាមខេត្តនានាក៏មានជាហូរហែ។ ជាក់ស្តែងដូចជាថតឲ្យផលិតកម្មរ៉ៃមាស តោមាស និងផលិតកម្មបុប្ផាជាដើមធ្វើឲ្យនាងរកប្រាក់ចំណូលបានយ៉ាងច្រើនក្រាសក្រែលក្នុងមួយខែៗ ផ្ទុយពីតារាចម្រៀងក្នុងផលិតកម្មហង្សមាស ដែលពុំសូវមានសិទ្ធិសេរីភាពក្នុងការស្វែងរកប្រាក់ចំណូល របស់ ខ្លួននៅខាងក្រៅឡើយ ដូច្នេះនេះជារបាំងមួយអាចនាំឲ្យចិត្តរបស់មាស សុខសោភាមានការរារែកខ្ពស់ក្នុងការ ដើរចេញពីទ្រនំចាស់ ខណៈដែលតារាខ្មែរជាច្រើនដួងសុទ្ធតែចង់បានជ្រកក្នុងទ្រនំហង្សមាស។
លោក អ៊ិន ទីតូ អ្នកគ្រប់គ្រង់តារាចម្រៀងក្នុងផលិតកម្មហង្សមាស បានប្រាប់ពីព័ត៌មានខ្លះៗទាក់ទិន នឹងការទាក់ទងឲ្យមាស សុខសោភាចូលច្រៀងក្នុងផលិតកម្មហង្សមាសឲ្យមជ្ឈមណ្ឌលព័ត៌មាន ដើមអម្ពិល ដឹងថា" វាអត់ទាន់មានរឿងនឹងកើតឡើងទេ ប៉ុន្តែថ្មីៗនេះមានគេទូរស័ព្ទសួរខ្ញុំច្រើនជុំវិញបញ្ហា នេះ។ ពេល នេះខ្ញុំ មិនទាន់មានការទាក់ទងទៅកាន់មាស សុខសោភាទេ។តែកន្លងមកតាមរយៈមនោសញ្ចេតនាស្រឡាញ់ រាប់អាន គ្នាដោយយើងធ្លាប់ជួបគ្នាក្នុងកម្មវិធីសិល្បៈរបស់មិត្តភក្រ័ ខ្ញុំធ្លាប់និយាយបញ្ហានេះជាមួយនាងពិតមែន ប៉ុន្តែ បើនិយាយឲ្យស៊ីជម្រៅថា នឹងចេញឬមិនចេញក៏អត់ទាន់មានដែរ "។
លោកអ៊ិន ទីតូ បានបញ្ជាក់ទៀតថា " ជាគោលការណ៍ ផលិតកម្មហង្សមាស មានការជ្រើសយកតារាចម្រៀង ថ្មីៗឲ្យចូលជាបន្តបន្ទាប់ពិតមែន ទើបខ្ញុំបង្ហើបពីបញ្ហានេះប្រាប់ដល់នាង(មាស សុខសោភា) ហើយបើនាង សម្រេចចិត្តថានឹងចូលមកក្នុងផលិតកម្មហង្សមាសពិតមែន យើងនឹងស្វាគមន៍គាត់ដោយក្តីរីករាយ " ទស្សនិក ជនកំពុងតែទន្ទឹងរង់ចាំមើលថា រវាងតារាចម្រៀងមាស សុខសោភា និង សុគន្ធ នីសា ដែលជាជើងខ្លាំងដូចគ្នា មួយណាទទួលការគាំទ្រច្រើនពីសំណាក់មហាជន ខណៈដែលសុគន្ធ នីសា កំពុងត្រៀមចេញាអាល់ប៊ុមថ្មីក្នុង ផលិតកម្មថោន ឯមាស សុខសោភា ជាម្ចាស់ផ្ទះនៅក្នុង ទ្រនំស្រាប់ហើយនោះ ៕
ប្រភព Dap-News
0 comments:
Post a Comment