ថ្ងៃសុក្រ ទី២ ខែធ្នូ ឆ្នាំ២០១១ ម៉ោង ០៨:៣៨
រាជធានីភ្នំពេញ ៖ ថ្វីបើកន្លងមកមហាជនទូទៅឃើញតារាចម្រៀងមួយគូគឺ កញ្ញាឆៃ លីដាឡែន និងលោកអេឡិច ចិន្ត្រា ទៅណាមកណា ឬច្រៀងនៅក្នុងផលិតកម្មនិងនៅ លើឆាកប្រគំតន្ត្រីចុងសប្តាហ៍តាមស្ថានីយទូរទស្ស៍នានាមិនដែល ឃ្លាតពីគ្នាទេ សូម្បីតែការថតរូបចុះទស្សនាវដ្តី កាសែត និងបង្ហោះនៅលើទំព័រ facebook បែបជាគូស្នេហាស្រើបស្រាលយ៉ាងណាក៏ដោយ ក៏នាងដាឡែននៅតែបដិសេធថា រូបនាងមិនពាក់ព័ន្ធស្នេហានឹងគ្នាទេ ។
កញ្ញាឆៃ លីដាឡែន និយាយថាថ្វីបើកន្លងមកនាងនិងលោកអេឡិច ចិន្ត្រា ទៅណាមកណាជិតស្និទ្ធគ្នាពិតមែនតែនោះគ្រាន់តែជាការរាប់អានគ្នា ក្នុងនាមជាមិត្តភក្តិរួមអាជីព រួមក្រុមតែប៉ុណ្ណោះ ឯរឿងស្នេហាគ្មានទេ។ នាងបញ្ជាក់ថា «បើលោកអេឡិច ចិន្ត្រា គិតថាស្រឡាញ់នាងខ្ញុំក៏ស្រឡាញ់ចុះមិនអាចហាមឃាត់ចិត្តគាត់បាន ទេគ្រាន់តែថា នាងខ្ញុំមិនអាចទទួលយកការស្រឡាញ់របស់គាត់បែបស្នេហា សង្សារ ឬគូអនាគតបានទេគឺ នាងខ្ញុំសូមស្រឡាញ់រាប់អានគាត់ត្រឹមតែជាមិត្តភក្តិរួមអាជីព ប៉ុណ្ណោះ។ ចំពោះការថតរូបកន្លងមកគ្រាន់តែជាសិល្បៈ ដើម្បីបង្កើនប្រជាប្រិយភាពប៉ុណ្ណោះ» ។
ទោះជាយ៉ាងណាក្តីរូបថតបែបស្រើបស្រាលរបស់នាង មិនយឹតយោងប្រជាប្រិយភាពរបស់នាងទេ ផ្ទុយទៅវិញមហាជនរិះគន់យ៉ាងខ្លាំងដោយថា ធ្វើឱ្យប៉ះពាល់ដល់ប្រពៃណី វប្បធម៌ជាតិ គឺមិនសមរម្យជានារីខ្មែរទេ ។
ទោះបីជាកញ្ញាឆៃ លីដាឡែន បដិសេធយ៉ាងណាក៏ដោយក៏មហាជនទូទៅនៅតែមានមន្ទិលសង្ស័យដដែល ហើយថែមទាំងនិយាយថា ពេលនេះនាងនិងលោកអេឡិច ចិន្រ្តា បែកបាក់ស្នេហាទៀតផង ព្រោះកាលពីពាក់កណ្តាលខែវិច្ឆិកា ឆ្នាំ២០១១ គេឃើញលោកអេឡិច ចិន្រ្តា ឡើងច្រៀងជាកិត្តិយសលើឆាកប្រគំតន្រ្តីនៃស្ថានីយទូរទស្សន៍អាស៊ី អាគ្នេយ៍ជាមួយកញ្ញាគឹម លីហ្សា ជាច្រើនបទដូចជាបទកំនួចវាយោ បទរាត្រីជួបភ័ក្រ្ត ជាដើម។ មិនតែប៉ុណ្ណោះប្រិយមិត្តទស្សនិកជននិងក្រុមអ្នកសិល្បៈមួយចំនួន និយាយថា ស្នេហាកញ្ញាឆៃ លីដាឡែន និងលោកអេឡិច ចិន្ត្រា បានចែកផ្លូវគ្នាដើរដោយអេឡិច ចិន្ត្រាជ្រើសរើសយកនាងគឹម លីហ្សា តែអ្នកទាំងបីបានបដិសេធរៀងៗខ្លួនេ។ ដាឡែន និយាយថា ពេលនេះនាងកំពុងតែរង់ចាំគូព្រេងព្រោះនាងមានអាយុ២៩ឆ្នាំ ហើយ៕
0 comments:
Post a Comment